Мунзук, Галина Максимовна

Майык:Государственный деятель Галина Максимовна Мунзук (1955 чылдың сентябрь 26, Кызыл хоорай) — совет база российжи артист, политик, Федерация Чөвүлелиниң кежигүнү (2011—2014). Россия Федерациязының алдарлыг артизи, Тыва Республиканың алдарлыг артизи

Намдары

Мунзук Галина Максимовна Кызыл хоорайга 1955 чылдың сентябрь 26-да төрүттүнген. 1978 чылда Щукин аттыг Театр училищезин дооскан.

1978 чылдан Тываның национал хөгжүм-шии театрынга ажылдап чораан. 1984 чылда Ленинчи комсомолдуң шаңналын, 1988 чылда — Тыва Республиканың Культура яамызының шаңналын алган. 2006 чылда Россия Федерациязының алдарлыг артизи, Тыва Республиканың алдарлыг артизи деп аттарга төлептиг болган. Россия Федерациязының Театр ажылдакчыларының эвилелиниң кежигүнү.

1984 чылда «Ак дүне одаг» деп кинога киришкен, 2009 чылда — «Чингис-Хаанның чажыды» деп кинога киришкен.

2008 чылда Тываның Дээди хуралынче бир дугаар соңгуттурган, 2010 чылда катап соңгуттурган.

2011 чылдың апрель 2-де Тыва Республиканың баштыңы Шолбан Кара-оол Галина Мунзукту Сергей Пугачёвтуң орнунга Федерация Чөвүлелиниң кежигүнү кылдыр томуйлаан доктаалга ат салган.

2011 чылдың июньдан ноябрь чедир Галина Мунзук Федерация Чөвүлелиниң Соңгу чүк болгаш биче буурай чоннар херээниң комитединге кирип турган, ооң-биле чергелештир июльдан ноябрь чедир Культура комиссиязынче кирип турган. 2011 чылдың ноябрьдан 2014 чылдың октябрьга чедир — социалдыг политика комитединиң кежигүнү.

2014 чылдың октябрьдан тура ону Мерген Ооржак солаан.

Өг-бүлези

Галина Мунзук — Акира Куросаваның «Дерсу Узала» деп кинозунга кол рольду ойнаан билдингир актёр Максим Мунзуктуң база актриса Кара-Кыс Мунзуктуң уруу.

Шөлүглер

• Мунзук Галина Максимовна. Энциклопедический справочник. Совет Федерации. Хынаан 16 Он айның 2019.
• Мунзук Галина Максимовна. Кто есть кто. Единая Россия. Хынаан 16 Он айның 2019.
• Мунзук Галина Максимовна. declarator.org. Хынаан 17 Он айның 2019.
• Галина Мунзук. КиноПоиск. Хынаан 17 Он айның 2019.