Tetun: Presidência da República Democrática de Timor-Leste

1 Std. ·

REPREZENTANTE HUSI POVU ATONI OE-CUSSE-AMBENO HUSU REVOGA DEKRETU PARLAMENTU NASIONÁL

Palásiu Prezidensiál Nicolau Lobato, Dili, 12 jullu 2019

Reprezentante husi Povu Atoni Oe-cusse Ambeno hasoru malu ho Prezidente Repúblika, Francisco Guterres Lú Olo, hodi hato’o preokupasaun kona-ba alterasaun Lei númeru 3/2014 no husu atu entidade hotu-hotu, inklui partidu polítiku sira tur hamutuk no Parlamentu Nasionál atu revoga Dekretu Parlamentu Nasionál ne’ebé altera Lei númeru 3/2014.

Povu Atoni Oecusse-Ambeno, reprezenta Liurai Costa, Liurai Hornai, Liurai Cruz, suku 18 no Naijuf/ Dato, organizasaun sosiedade sivíl no juventude, hato’o preokupasaun relasiona ho alterasaun Lei númeru 3/2014 husi Parlamentu Nasionál, ne’ebé hasai kbiit Prezidente Repúblika atu nomea no fó posse ba Prezidente Autoridade RAEOA/ZEESM. Nune’e, ho alterasaun ne’e hamihis konsensu nasionál entre orgaun Estadu ne’ebé halo iha 2014 kona-ba hahú ba dahuluk programa integradu dezenvovimentu territoriál-ZEESM, programa Estadu, hahú uluk iha Oecusse Ambeno.

Antonio Lelan, reprezenta liurai Costa, liurai Hornai no Liurai Cruz, chefe Suku 18 no dato/Naijuf Oecusse hato’o:

“Povu Oecusse sente triste tanba Parlamentu Nasionál altera lei numeru 3/2014 ho lalais no la konsulta intendade hotu liu-liu povu Oecusse. Ho ida ne’e liuhusi deklarasaun povu Oecusse, husu ba Presidente Repúblika, Dr. Francisco Guterres Lú Olo, no entidades hotu iha Timor Leste inklui Partidus Politiku sira atu tuur hamutuk hodi husu ba Parlamentu Nasionál atu revoga Dekretu Parlamentu Nasional ne´ebé altera lei n 3/2014, de 18 de juñu.”

Reprezentante Povu Atoni Oecusse Ambeno simu ho laran luak tanba Estadu hatuur RAEOA no ZEESM ho forsa legál husi artigu 5 pontu 3 Konstituisaun RDTL nu’udar kompromisu polítiku no tuir lisan Oecusse nian. Reprezentante husi Povu Atoni fó hanoin mós kompromisu kulturál ne’ebé halo iha 2014 ho prezensa lideres Nasionais nian ne’ebé halo sira fiar metin katak programa integradu ZEESM sei hala’o tuir Lei númeru 3/2014, 18 juñu 2014, no babeibeik to’o 2030.

Reprezentante husi komunidade Oecusse-Ambeno rekoñese benefísiu oioin ne’ebé hetan husi RAEOA no ZEESM tanba ohin loron povu Oecusse la izoladu ona, eletrisidade ba kuaze populasaun tomak, irigasaun, estrada, otel, klínika ne’ebé fó oportunidade ba povu atu dezenvolve an.

Reprezentante husi komunidade Oecusse-Ambeno iha nia enkontru ho Prezidente Repúblika hateten katak prosesu dezenvolvimentu ne’ebé la’o to ohin loron bele lalais tanba Lei númeru 3/2014, 18 juñu, ne’ebé fó forsa no dalan atu iha autonomia finanseira no jestaun finanseiru ne’ebé di’ak.

Iha enkontru ne’e Reprezentante sira hakarak Mari Alkatiri, ne’ebé ninian mandatu remata iha 30 jullu, kontinua kargu nu’udar Prezidente Autoridade atu bele hatutan obra estadu nian ba Rejiaun Pante Macassar, Oesilo, Passabe no Nitibe.

Ba reprezentante husi komunidade Oecusse, Prezidente Repúblika hateten katak kompriende preokupasaun kona-ba alterasaun Lei no 3/2014, mandatu Prezidente Autoridade no realidade ne’ebé sei akontese iha futuru.

Prezidente Repúblika hateten katak agora sei estuda hela lei refere no sei uza nia poder konstitusionál hodi deside.