Tetun: HAFOIN RONA KONSELLU SUPERIOR DEFEZA NO SEGURANSA, PREZIDENTE REPÚBLIKA SEI DESIDE
Palásiu Prezidensiál Nicolau Lobato, Díli, 27 janeiru 2022
Prezidente Repúblika, Francisco Guterres Lú Olo, sei uza nia kompeténsia atu ezonera, nomea no promove xefias FALINTIL-Forsa Defeza Timor-Leste (FFDTL), hafoin rona membru Konsellu Superior Defeza no Seguransa (KSDS) nia hanoin.
Ohin, Konsellu Superior Defeza no Seguransa reune fó sira-nia hanoin kona-ba proposta husi Governu nian ne’ebé deside iha Konsellu Ministru, iha 21 janeiru 2022, hodi ezonera Tenente Jenerál Lere Anan Timur, ezonera Majór-Jenerál Falur Rate Laek husi kargu Vise-Xefe Estadu-Maiór-Jeneral, nomeasaun Majór-Jenerál Falur Rate Laek ba kargu Xefe Estadu-Maiór Jenerál Forsas Armadas, nomeasaun Brigadeiru Jenerál Calisto dos Santos Coliati ba kargu Vise-Xefe-Estadu-Maiór Jenerál Forsas Armadas no mantein nomeasaun Komodoru Pedro Klamar Fuik ba kargu Xefe Estadu Maiór Forsas Armadas.
Prezidente Repúblika prezide reuniaun KSDS hodi ko’alia kona-ba ezonerasaun, nomeasaun no promosaun jenerais Forsas Armadas nian.
Prezidente Repúblika loke reuniaun ne’e hato’o proposta Governu nian no fó oportunidade ba Primeiru Ministru Taur Matan Ruak esplika kona-ba desizaun Konsellu Ministru nian kona-ba ezonerasaun, nomeasaun no promosaun jenerais Forsas Armadas.
Membru orgaun konsultivu ne’e fó ona sira-nia hanoin no kabe kompeténsia Prezidente Repúblika atu deside:
“Bainhira esplika tiha situasaun ne’e idaidak mós fó hanoin. Fó hanoin barak, hanoin pozitivu. Orgaun konsulta, Prezidente mak sei deside,” Chefe da Casa Militár hatutan.
Prezidente Repúblika sei halo analiza ba opiniaun sira ne’e no foti desizaun iha tempu badak nia laran. Chefe da Casa Militar hateten katak desizaun sei foti iha tempu badak nia laran:
“Bele loron ida, loron rua, bele oras mós bele. Estuda kuandu to’o ona nia fó-sai.”
Ajenda ne’ebé ko’alia iha reuniaun liga direta ho ezonerasaun Xefe Estadu Maior Jenerál Lere Anan Timur nian tanba ne’e tuir regra membru Konsellu ne’e tenke husik fatin enkontru nian. Hafoin reuniaun, Chefe da Casa Militár António Soares Maukalo esplika:
“Kuandu mai atu deskute kona-ba jeneral nian, desde assuntu ne’e trata kona-ba jeneral nian situasaun, regra regula dispensa tiha jeneral hela iha li’ur. Tanba ne’e mak ohin jeneral sai tiha ba li’ur.”
Nu’udar Komandante Supremu Forsas Armadas nian, Prezidente Repúblika haktuir de’it prosedimentu legais kona-ba ezonerasaun, nomeasaun no promosaun ne’ebé hakerek iha Konstituisaun no Lei sira.
MÍDIA PR.